Þátttaka Íslendinga í ólympíumótum

Íslendingar tóku fyrst þátt í ólympíumótinu í Skák í Hamborg 1930, við upphaf heimskreppunnar. Íslensku blöðin greindu frá ferðinni, í frekar stuttu máli reyndar, enda voru au þá aðeins nokkrar síður og höfðu ekki mikið rými.

Hinn 2. nóvember 1930 ræddi skákritari Morgunblaðsins um, að menn hefðu gagnrýnt sig fyrir að hafa lítið sagt frá ferð íslenskra skákmanna á "alheimsmótið í Hamborg" og "látið birta töfl þeirra." En þögn mín, sagði hann,

kemur ekki til af því, að jeg álíti ekki ferðina þess verða að skrifa um hana, heldur meir af hinu, að mjer hefir virst að flestir væri sammála um það, að ferðin hafi gengið vel, og árangurinn betri en búast mátti við -- og því óþarft að færa fram rök fyrir að svo hafi verið.

Hann hafði þó fengið, vísast úr þýska skákblaðinu, skýrða skák Þjóðverjans Ahue og Eggerts Gilfers, með skýringum snillingsins Tartakowers, og hafi því ákveðið að fjalla um mótið. Ljósmynd þessarar greinar er hér til hægri.

Þetta var upphaf þátttöku Íslendinga í "alheimsskákmótinu", eða ólympíumótinu í skák. Miðað við fólksfjölda má segja, að fáar þjóðir hafi, í heildina, staðið sig betur. Til að mynda man kynslóð sú, sem pistilhöfundur þessi (SGB) tilheyrir, mest eftir hinum frábæra árangri í Dubai 1986, þar sem Ísland náði að mig minnir 5. sæti, þrátt fyrir ýmis áföll og að hafa teflt við flestar sterkustu þjóðirnar. Þar fór hápunktur "fjórmenningaklíkunnar" og bók Jóns L. Árnasonar og co frá ferðinni var með skemmtilegri skákbókum, sem komið hafa út á íslensku, enda Jón L. afskaplega skemmtilegur "penni". En hæst bera þó að öðru leyti ferðirnar til Buenos Aires 1939 og 1978, Kúbu 1966 og e.t.v. Berlín 1936, a.m.k. í sögulegu samhengi. Mótin í Moskvu voru jafnframt merkilegt, og fleiri. En flestir muna vísast þau mót, sem best gengu meðal þeir voru að alast upp. Síðasta mót fór fram í Dresden í Þýskalandi 2008.

Hér að neðan birtist ófullgerður listi, sem ég held að Daði Örn Jónsson hafði tekið saman á sínum tíma. Reynt verður að fylla inn í eyðurnar eftir því sem færi gefast og skrifa dálitla pistla um hverja ferð. Lumi menn á myndum eða nauðsynlegum upplýsingum væri vel þegið að fá slíkt sent í tölvupósti eða póstleiðis til skrifstofu SÍ, ekki síður frá ólympíuferðum kvenna og ólympíusigurs unglinga á sínum tíma.

SGB